Գետքի միջնակարգ դպրոցում տեղադրվել է 30 կՎտ հզորությամբ արևային էլեկտրակայան

Շիրակի մարզի Գետքի միջնակարգ դպրոցում տեղադրվել է 30 կՎտ հզորությամբ արևային Ֆոտոէլեկտրական կայան՝ «Զարգացող երկրներում կլիմայի փոփոխության մեղմման և կլիմայի փոփոխության ադապտացման համար լուծումների և տեխնոլոգիաների ներդրում՝ փոխանցելով լիտվական փորձը» ծրագրի շրջանակներում։ Արևային կայանի տեղադրումն իրականացրել է տեղական գործընկեր «ՕՀՄ էՆԵՐՋԻ» ընկերությունը։

Ս/թ հունիսի 16-ին տեղի է ունեցել ծրագրի բացման արարողությունը, որին մասնակցել են Հայաստանում Լիտվայի արտակարգ և լիազոր դեսպան Ինգա Ստանիտե-Տոլոչկիենեն, շրջակա միջավայրի նախարարի տեղակալ Աննա Մազմանյանը, Շիրակի մարզպետարանի կրթության, մշակույթի և սպորտի վարչության պետ Հրայր Կարապետյանը, «Solet Technics» ընկերության ներկայացուցիչները, «ՕՀՄ էՆԵՐՋԻ» ընկերության ֆինանսական և կոմերցիոն տնօրենները, Գյումրի մասնաճյուղի տնօրենը և այլ հյուրեր։

Արևային էլեկտրակայանը թույլ կտա դպրոցին հոգալ էլեկտրաէներգիայի սեփական կարիքները։ Ծրագիրը ֆինանսավորվել է Լիտվայի Հանրապետության շրջակա միջավայրի նախարարությանը կից գործող բնապահպանական նախագծերի կառավարման գործակալության կողմից:

«ՕՀՄ էՆԵՐՋԻ» - ն շարունակում է ընդլայնել ծրագրի շրջանակները։ Այս տարի նախատեսվում է իրականացնել ևս մի քանի նախագիծ ՀՀ տարբեր մարզերում։