Միաբյուրեղային, թե՞ բազմաբյուրեղային արևային վահանակներ (պանելներ)․ հասկանանք միասին

Արևային վահանակների տարաբնույթ առաջարկները, հաճախ, շփոթություն են առաջացնում: Մինչ որոշները պնդում են, որ միաբյուրեղային արևային վահանակներն այլընտրանք չունեն Ձեր նախագծի համար, մյուսներն էլ բացառում են նման տեսակետը՝ ապացուցելով պոլիկրիստալ վահանակների նպատակահարմարությունը, երբեմն նույնիսկ անփոխարինելիությունը։ Այս դեպքում սպառողները հայտնվում են բարդ իրավիճակում՝ չկողմնորոշվելով միաբյուրեղ, թե բազմաբյուրեղ վահանակ ընտրել։

Տարբերությունն արևային վահանակների տեսակների միջև պատրաստման եղանակների առանձնահատկություններն են: Չնայած նրան, որ 2-ն էլ պատրաստվում են բյուրեղների բլոկներից, մոնոկրիստալ արևային վահանակ ստանալու համար օգտագործում են միաբյուրեղ սերմ (բնական կամ լաբորատոր եղանակներով), որը թույլ է տալիս ունենալ ավելի համասեռ ու հարթ տեսք, քան պոլիկրիստալների մոտ է։

Արտադրողները միաբյուրեղային արևային վահանակներ ստանալու համար կիրառում են Չոխրալսկու մեթոդը՝ օգտագործելով մաքուր սիլիկոնի միաբյուրեղ (Նկ․1)։ Տեխնոլոգիայի առանձնահատկությունը կայանում է հալված մոնո­բյու­րե­ղա­յին սիլիկոնից մեկ սիլիկոնային բյուրեղ դանդաղորեն դուրս հանելու մեջ, որին հաջորդում է ձուլակտորի ձևավորումը։ Բյուրեղային սերմը (կամ բյուրե­ղիկը) սիլիկոնի փոքր մասն է, որն էլ հալված մոլեկուլների հիմքն է կազմում: Ապահովելով ճիշտ ենթակառուցվածքներ՝ մո­լե­կու­­լային հալոցանյութերը կարող են կապվել ձևավորվող ձուլակտորի հետ: Սերմի կազմավորման ընթացքում ջերմաստիճանն աս­տի­ճա­նաբար նվազեցվում է՝ օժանդակելով գլանային տեսքի ստացմանը:

(Նկ․1) Մոնոկրիստալ արևային վահանակի բջիջ

Ի տարբերություն միաբյուրեղայինի՝ բազմաբյուրեղ արևային վահանակները պատրաստվում են բյուրեղի բազմաթիվ քանակներից (Նկ․2): Արտադրողները միաբյուրեղի դան­դաղ և ծախսատար ստացման գործընթացի փոխարեն, պարզապես հավաքում են բյուրեղային հատիկը հալոցքային սիլիկոնի մեջ և թույլ տալիս նրան հովանալ: Այս ձուլման մեթոդի միջոցով շրջապատելով բյուրեղին, սերմը չի հանդիսանում համասեռ և ա­ճում են մի քանի մանր բյուրեղներ:

Միաբյուրեղային արևային վահանակի կարևոր առավելությունները բաղկացած են մի շարք գործոններից։ Դրանք համեմատած բազմաբյուրեղային վահանակի ունեն ավելի բարձր էֆեկտիվություն (սովորաբար, 15%-20%), մինչդեռ բազմաբյուրեղային արևային վահանակի էֆեկտիվությունը տատանվում է 13%-16%-ի սահմաններում։ Այս հանգամանքը պայմանավորված է սիլիկոնի մաքրության աստիճանով, քանի որ միաբյուրեղային արևային վահանակի դեպքում սիլիկոնի մաքրություն աստիճանն ավելի բարձր է, հետևաբար կարողանում է ավելի բարձր էներգաարդյունավետություն ավահովել։

Միաբյուրեղային արևային վահանակի հաջորդ կարևոր առավելությունը տարածքի օպտիմալ օգտագործումն է (Նկ․3)։ Շնորհիվ իրենց բարձր էներգաարդյունավետության՝ դրանք կարողանում են ավելի քիչ տարածք զբաղեցնել, քան բազմաբյուրեղային արևային վահանակները։ Օրինակ 3 ՄՎտ հզորության արևային կայան ստանալու համար միաբյուրեղային արևային վահանակները համեմատած բազմաբյուրեղային տեսակի արևային վահանակների ավելի քիչ տարածք կզբաղեցնեն, քանի որ ունեն ավելի բարձր արդյունավետություն և ավելի քիչ վահանակներ են պահանջվում անհրաժեշտ հզորությունն ապահովելու համար։

(Նկ․3) Մոնոկրիստալ արևային վահանակներով տեղակայված կայան Հայաստանում

Այս ամենից զատ միաբյուրեղային արևային վահանակներն ունեն ծառայության ավելի երկար ժամկետ (սովորաբար արտադրողները առաջարկում են մինչև 25 տարվա երաշխիք) և թույլ լուսավորված պայմաններում ավելի լավ են գեներացնում էլեկտրաէներգիա, քան բազմաբյուրեղային տեսակի վահանակները: Միակ առավելությունը, որն ունի բազմաբյուրեղային արևային վահանակը միաբյուրեղային արևային վահանակի նկատմամբ ցածր գինն է։

Կարելի է եզրակացնել, որ ծախսերի կրճատման տեսակետից իդեալական տարբերակը բազմաբյուրեղային արևային վահանակն է, մինչդեռ, եթե չեք ուզում ձեր խնայողություններն իրականացնել ի հաշիվ որակի, նման պարագայում ճիշտ ընտրությունը միաբյուրեղային արևային վահանակն է։