Ի՞նչ երաշխիքներ են գործում արևային համակարգեր տեղադրելիս

Արևային կայանի տեղադրումը կարևոր ու պատասխանատու քայլ է, որի անհրաժեշտությունը կարող է պայմանավորված լինել տնտեսական, բնապահպանական, տեխնոլոգիական ու սոցիալական մի շարք գործոններով, որոնք տարբերվում են կախված կոնկրետ իրավիճակից ու կարիքներից:

Այս ամենը հաշվի առնելով՝ կարևոր է հասկանալ, թե ի՞նչ երաշխիքներ են տրվում արևային կայանի տեղադրման ժամանակ, և ի՞նչ հանգամանքների է պետք ուշադրություն դարձնել երկարաժամկետ ու արդարացված ներդրում կատարելու համար։

Արևային կայանների համար տրվող երաշխիքներին ուշադիր լինելով՝ կարող եք խուսափել մի շարք տարածված խնդիրներից։ Երաշխիքները տարբեր են՝ ապրանքի, արտադրողականության, ինչպես նաև՝ սպասարկման։

Երաշխիքի տևողությունը. Սովորաբար արևային վահանակներն ունեն 10-ից 30 տարի երաշխիք, մինչդեռ ինվերտորները, մոնտաժային համակարգերը և այլ բաղադրիչներ կարող են ունենալ ավելի կարճ երաշխիքային ժամկետներ։

Արտադրող. Արտադրողի հեղինակությունը կարևոր է: Հայտնի ու հեղինակավոր ընկերությունները սովորաբար ավելի ամուր ու երկարաժամկետ երաշխիքներ են տալիս: Կարևոր է արևային վահանակներ ու սարքավորումներ ընտրել վստահելի, փորձառու ու հեղինակավոր մատակարարից։

Սպասարկման երաշխիք. Արևային վահանակների շատ արտադրողներ տրամադրում են սպասարկման երաշխիքներ՝ երաշխավորելով որոշակի ժամկետով էլեկտրաէներգիայի արտադրության որոշակի մակարդակ (օրինակ՝ 30 տարի): Եթե ​​վահանակների արդյունավետությունը որոշակի մակարդակից ցածր է, ընկերությունը կարող է առաջարկել փոխարինում կամ վերանորոգում:

Տեղադրման երաշխիք. Եթե արևային համակարգը տեղադրվում է պրոֆեսիոնալ ընկերության կողմից, նրանք կարող են երաշխիք տրամադրել տեղադրման որակի ու սպասարկման վերաբերյալ:

Աշխարհագրական գործոններ. Կլիմայական պայմաններն ու գտնվելու վայրը նույնպես կարող են ազդել երաշխիքի վրա: Օրինակ, որոշ արտադրողներ կարող են երկարաձգված երաշխիքներ տրամադրել ծայրահեղ եղանակային պայմաններով տարածաշրջաններում տեղադրված արևային կայանի համար:

Ի դեպ, եթե ապրանքի և արտադրողականության երաշխիքը տալիս է արտադրող ընկերությունը, ապա սպասարկման երաշխիքի պատասխանատուն տեղադրող ընկերությունն է։ Հենց նրանք պետք է գտնեն ու հարթեն առաջացած խնդիրը։

Հարկ է նշել, որ արևային վահանակները աշխատում են տրվող երաշխիքներից ավելի երկար և ընկերության կողմից տրվող երաշխիքը չի ենթադրում, որ սարքը դադարելու է աշխատել երաշխիքի սպառվելուց հետո։

Անհրաժեշտ է հավասարապես կարևորել բոլոր երաշխիքները՝ ուշադիր լինել արտադրողի ու տեղադրող ընկերության կողմից տրվող առանձին երաշխիքներին, նախագծող, տեղադրող մասնագետների որակավորումներին, տեղական ու միջազգային ստանդարտներին։

Արևային կայանի տեղադրման ժամանակ անհրաժեշտ է մանրակրկիտ ուսումնասիրել առաջարկվող երաշխիքներն ու հետևողական լինել դրանց կատարմանը՝ կայանի արդյունավետությունն ու երկարակեցությունը պահպանելու համար: